വീഞ്ഞിന്‍റെ വീര്യം കുറയുമോ, കുപ്പി മാറിയാലും?
ക്വോട്ട്
''ഞാന്‍ അഫ്ഗാനിസ്ഥാനിലെ ഒരു പട്ടാള യൂണിറ്റില്‍ നിന്നാണ്‌ ഇതെഴുതുന്നത്. ഒരു നല്ല തുക ഇവിടെ നിന്ന് രാജ്യത്തിനു പുറത്തേയ്ക്ക് മാറ്റാനുണ്ട്. എന്‍റെ പങ്കാളികള്‍ക്കും എനിക്കും വിശ്വസ്തനായ ഒരാളായിരിക്കും താങ്കളെന്നു തോന്നിയതു കൊണ്ടാണ്‌ ഈ കത്ത്. ഇത് നിയമാനുസൃതമായ ഒരു പ്രവൃത്തി ആയതിനാല്‍ ആശങ്കയ്ക്ക് വകയില്ല. താഴെ കൊടുക്കുന്ന ഇ-മെയില്‍ ഐ.ഡി യില്‍ ബന്ധപ്പെടുക.
ശൂഹ്രച്റ+ (ഒപ്പ്)
മേജര്‍ അലന്‍ എഡ്‌വേര്‍ഡ് ''
അണ്‍ക്വോട്ട്
ഇത് എനിക്ക് ഇന്നു കിട്ടിയ ഒരു ഇ-മെയില്‍ സന്ദേശമാണ്‌
ഈ മേജര്‍ അലന്‍റെ (പണ്ട് മദിരാശിയിലെ ഓഫീസേഴ്സ് ട്രെയ്നിംഗ് സ്കൂളില്‍ എന്‍റെ കൂടെയുണ്ടായിരുന്ന എഡ്വേര്‍ഡിന്‍റെ മകനാകും. അയാള്‍ പിന്നെ സൈന്യം വിട്ട് അമേരിക്കയിലേയ്ക്ക് കുടിയേറിയിരുന്നു. അയാളുടെ മകനായിരിക്കും. ഞാനിപ്പോള്‍ കാനഡയിലായതു കൊണ്ട് എന്നെ വിശ്വസിച്ച് എഴുതിയതാവും!) ഒരു കാര്യം! ഞാനിവനെ കൊണ്ടു തോറ്റു. എന്നാലും അവന് ഇക്കാലമത്രയും കഴിഞ്ഞിട്ടും മറക്കാതെ എന്നെ ഓര്‍ത്തുവച്ച് മകനോടു പറഞ്ഞല്ലോ, ഞാന്‍ വിശ്വസ്തനായിരിക്കും എന്ന കാര്യം. അതാണ്‌ സ്നേഹബന്ധം എന്നൊക്കെ പറയുന്നത്! നമ്മുടെ ആള്‍ക്കാര്‍ക്ക് ഇല്ലാത്തതും അതല്ലേ? എന്തായാലും ഞാന്‍ അവന് മറുകുറിപ്പ് എഴുതാന്‍ പോകുന്നു. നമ്മളെ വിശ്വസിച്ച്, ഓര്‍മ്മവച്ച്, ഇങ്ങനെയൊരു നല്ല കാര്യത്തിനു മുതിരുമ്പോള്‍ നാം അയാളെ കൈ വെടിയുന്നത് ശരിയാണോ? എന്‍റെ ബാങ്ക് അക്കൗണ്ട് വിവരങ്ങളും ഒരു ചെറിയ തുകയും ചെലവിനായി അയയ്ക്കണം. അതത്ര വലിയ കാര്യമാണോ!
Comments