കടത്തുകൂലി

ഴാങ് ബത്തീസ്ത് ലലി (Jean Baptiste Lully) യുടെ സംഗീതനാടകത്തില്‍ കെറോണി (Charon) ന്റെ ഒരു പരസ്യപ്രഖ്യാപനമുണ്ട്.

''ഇന്നല്ലെങ്കില്‍ നാളെ നിങ്ങളെല്ലാം എന്റെ കടത്തു കടക്കേണ്ടവരാണ്‌!''

''Sooner or later, you'll all have to cross in my boat!''

ഇന്നലെ ദ് ബൂണ്‍‌ഡോക് സെയിന്റ്സ് (The Boondock Saints) എന്ന സിനിമ കണ്ടു. ട്രോയ് ഡഫിയുടെ, 16 വര്‍ഷം മുമ്പുള്ള ചിത്രം. അതിലെ ഒരു വെടിവയ്പ്പില്‍, മരിച്ചവരുടെ കണ്ണുകളിലോരോന്നിലും നാണയങ്ങള്‍ വച്ചിരിക്കുന്നതു കണ്ടു. മരണാനന്തരം സ്റ്റിക്സ് നദി കടക്കുമ്പോള്‍ കടത്തുകാരനായ കെറോണിനു കൊടുക്കേണ്ട കൂലിയാണ്‌. കൂലി കൊടുക്കാത്ത പക്ഷം ചെളിയിലോ തിരയിലോ നിങ്ങള്‍ താഴ്ന്നു പോകും.

പുരാതനഗ്രീസിലെ ശവസംസ്ക്കാരങ്ങളില്‍ പരേതരുടെ വായ്‌ക്കുള്ളില്‍ നാണയങ്ങള്‍ ഇടുന്നത് കെറോണിന്റെ കടത്തുകൂലിയായിട്ടായിരുന്നു.

സിനിമയ്ക്കു ശേഷം ഞാന്‍ വായിക്കുന്ന ആദ്യ ഇ-മെയിലില്‍ പരിചയപ്പെടുന്ന വാക്ക് 'കെറോണ്‍' ആയിരുന്നു. എന്തൊരദ്ഭുതം! ഒരു വാക്കു പുതിയതായി കേള്‍ക്കുമ്പോള്‍ത്തന്നെ മറ്റെവിടെയെങ്കിലുമൊക്കെ വായനയില്‍ വീണ്ടും കണ്ടെത്തുന്നത് രസകരമാണ്‌. ഒരാളെ പരിചയപ്പെടുന്നതിനു പിന്നാലെ തന്നെ പല സ്ഥലത്തായി വീണ്ടും കണ്ടുമുട്ടുക. അതു രസകരമാണ്‌.

പക്ഷേ, അതിനും ഒരു പേരുണ്ട്. അതെന്താ?